Braziliyada işgüzar səfərdə olan Beynəlxalq Futvole Federasiyasının prezidenti Vüsal Xəlilov Braziliya Futvole Federasiyasına rəhbərlik edən Anderson Aguia ilə görüşüb.
Futnet.az xəbər verir ki, Rio de Janeyro şəhərində baş tutan görüşdə Azərbaycan Futnet Federasiyasına da başçılıq edən Xəlilov braziliyalı qurum rəsmisinə hədiyyələrini təqdim edərək, ölkəmizdə bu idmana marağın getdikcə artmasından danışıb.
Həm federasiya prezidenti, həmdə futvole ulduzu olan Anderson Aguia Bakıya səfəri zamanı ona göstərilən xoş münasibətdən çox məmnun qaldığını və Azərbaycanın yerli federasiyasının təşkilatçılığının yüksək səviyyədə olduğunu bildirib.
Görüş zamanı Vüsal Xəlilovun Beynəlxalq Futvole Federasiyasına prezident təyin olunmasından sonra istər struktur, istərsə də təbliğat baxımından böyük yol qət edildiyini söyləyən Aguia bu qurumun bayrağı altında keçirilən yarışlarda iştirak etməkdən böyük məmnunluq duyacaqlarını söyləyib.
Eyni zamanda prezident Vüsal Xəlilov beynəlxalq federasiyanın nüfuzunun artırılması üçün daha geniş arealda turnirlərin təşkilinin vacibliyindən bəhs edib. Üstəlik, dünyanın bir çox sabiq futbol ulduzunun futvoleyə cəlb edilməsinin önəmli olduğunu, bunun bu idman növünün təbliğatında mühüm rol oynadığını qeyd edib.
Xatırladaq ki, sabah Rio de Janeyroda start götürəcək turnir Bakıda baş tutacaq dünya çempionatının seçmə mərhələlərindən biridi.
